قلت: أقول ترى ابتسام تحتريك بالمستشفى يالنصاب !! ( دحجني ) بنظره حاقده وخذ جواله
وجلس ساكت وهو عيونه حمراء وبحر أمواج خدوده قاعده تتلاطم من قوة التهزيئه
وفجأة إذا بنا على أعتاب السوق الجميل سوق عتيقة المركزي
( الفصل الثاني )
<< لحظات ماقبل الحسم >>
دخلنا سوق عتيقه .. شريت كم حزمة خس على جرجير مع كراث وبطاطس على كوسه ..
وطماط وكرتون بردقان مصري وتفاح أحمر وعنب احمر عشان احس اني مودرن وولد نعمه
وطبعاً مانسيت الخيار لأني من النوع اللي يحب المكرووونه موت .. ولا تسألوني وش دخل المكرونه بالخيار لأني باختصار: أكره الحمبص
وهنا اشتدت وتيرة الاحداث .. --> وصف هوليودي
قاعد أحاسب راعي البسطه ..فـ مر من جنبي شبح !! هالشبح ياجماعة الخير ( لحس ) مخي!
خلاني بدون شعور أطلق تصفيره من شفايفي واقول: أويل حالي ويلاه .. يووووووه !!
دققت النظر .. وأثاريها بنت .. عليها عباية كتف مخصرة .. ياشيخ ألعن من خصر حرمة بابآي
والطرحه يلعب بها الهواء .. والنقاب ياقلبي على النقاب .. يذبحك ذبح الشاة بدون سكين ...
والعيون كل الكحل اللي بمحلات أبوريالين مكبوب فيها..والجوال (معلق) بالصدر بحركة سرياليه ..
هذا غير الزخارف اللي باالأكمام والدناديش اللي في جوانب العباة !!
طبعاً خلاف العطر اللي ريحته (شقت) خشمي وطلعت من بؤبؤي
أخوكم في الله ( بلم وفيوزاته ضربت ) وصرت زي ماقال الشاعر في كتاب النصوص :
مرحوم يا ضبٍ على الخط مدعوس ** له سبعة أيامٍ ومحدن درى به
قعدت أتمقل فيها .. أبحلق . أناظر.. متعجب!! وفجأة ..سددت لي نظره !!
و طاحت عينها بعيني.. ومن لهفة الموقف طاح أخوكم على بسطة الخضار حقت البياع ..
حسيت أثناء سقوطي بضحكة بانت في عيونها العذاب ..
شالني فهد والبياع وهم (يسموون)علي .... وقال لي ابوفهيد بخبث ابليسي ماكر:
حياتي.. الغزال يلزمك أو تتركه لحبيبك أبو فهيد؟
نقزت وقلت : أبوفهيد بلاش تكفى حكي أهل العصابات ترى تخوفني.. وش تقصد ؟
قال لا تستهبل معي.. البنت عينها عليك من يوم دخلت السوق..يعني ياتروح تظبط أمورك معها..
أو اتركها للي يفهمون هالشغلات .. وطق على صدره !!
نقزت ببراءة تثير الشفقة وقلت: لا لأ في ذمتك وفي صلاة امك وابوك .. الله يفضخ عيونك ان ناظرتها. . أنت عندك تغريد وهدى وغيرهم..
خل هذي لي أنا ( حالها ) قبلك .. ضحك وقال بمكر قروي!! : يهنيك فيها ياشيخ..لعيونك تركناها..
بيني وبينكم ترددت . لأني ماعمري عشت كذا موقف ,,. قعد يوسوس لي بليس عن يميني وابوفهيد عن يساري ويقولون:
الحين تعجز تروض مهرة جت تتحرش فيك ..
حسيت انه استفزني بيني وبينكم والكلام للجميع .. رحت طاق صدري وقلت:
أنا ولد ابوي !! إرس ياترس واعتدل ياملف .. اليوم يومي وانا اخو شقحاء
طلعت قرطاسة علك ابونعناع غندور وكتبت الرقم وتحته اسم: لؤي
ولأول مرة في حياتي العمليه..قربت من البنت ورميت الرقم.. وجيتك أركض للسيارة وابوفهيد وراي ولا تسألوني عن الجرجير وكرتون البطاطس لأني نسيت اسمي وقتها
........................
مر يومين على القصه هذي .. ويأست من اتصال ( الغزال ) اللي ماطلع من بالي أبد ..
أيقنت أن البنت تركت الرقم بالأرض وطنشت ..
وفي تمام الثالثة فجراً .. ترن .. ترن .. (طبعاً نغمة موسيقيه بس مقدر أكتبها قلت : ترن ترن وافهموا )
رقم غريب كان واضح أنه رقم ( سوا ) .. قلت: ألو؟ جاني صوت حنون حنون خلى جوالي (يموع) في يدي ..
ألووووووه ... هاااااي .. الأخ لؤي ؟ ؟ قلت: لا .. إلا صح أنا لؤي نعم ؟
قالت: وش هالحركات ؟ قلت : أي حركات مافهمت ؟ ---> عمري يالبريء
قالت: الترقيم اللي بالسوق أو تسوي ناسي ؟ قلت : آها ذكرت بس والله آسف ..
قالت:وين اصرف آسف هذي فيه !! قلت بحنية مستفيدها من ابوفهيد الداشر:
والله آسف..ليت تعذريني..اختي عيونك وفتنتها الله يعلم خلتني أسوي شيء أول مرة اسويه بحياتي..
(( بيني وبينكم حسيت أن البنت تسلكت واستانست بالمدحه..رحت مزود العيار )) قلت :
حشا مو عيون هذيك.. هذيك أسلحة دمار شامل راح بوش يدورهم عند صدام وهم بعيونك !!
صدقيني أول ماشفتك قلت مستحيل تكون هذي انسانه مثلنا ..
هذي أكيد لوحة من لوحات بيكاسو طاحت منه وهو يتمشى في عتيقة !!
(( البنت داخت .. وبديت أحس ان صوتها قام يرعد .. واخوكم في فن التسليك استاد ))
قامت تضحك بدلع وقالت : الله اسلوبك حيل..حييل.. حيييل يجنن !! دمك بالمرة خفيف ..
رحت مزود العيار مرة وحده وقلت: فيه نصراوي مات ابوه قال كله من الحكم !!
ضحكت بصوت عالي:ههههههههههههااي الله يرجك يا لؤي ..
قلت: هاااه !! من لؤي ؟ قالت: ههههههههههههاا ههههه هذي بعد مرة حلوة..
من غيرك قاعدة أكلم .. الله يرجك لؤي!!
رحت مصرفها قلت : ايه استهبل معك (( بغيت اجيب العيد لأني أول مرة اسمع بلؤي ))
قلت: بليز ..بونسواغ ؟.؟ وش اسمك؟ ماتشرفت فيه ؟ ---> مسوي مثقف وهو أدلخ فرنسي
جاوبتني بدلع تبطي حليمة بولند تجي ربعه : إممممممم ماراح أقولك.. بس أول حرف (نوون ) ؟
قلت بدلاخه متأثرة بموسم التمور : نوون .. نووون .. نبوت سيف ؟!
قامت تضحك بقوة وتقول الله حسيبك يالؤي ماقد ضحكت هالضحك قبل اليوم وااااو وناسه انت ..
اوكي را ح اقولك .. معك ((نانسي)) يا لؤي .. اسمي ((نانسي)) ..
المهم راحت ساعه وربع غزل ودلع وتنكيت..قمنا نسولف سواليف لين أقام الفجر !! قالت وهي مستعجله:
لؤي عن اذنك الوالد قام يصلي واخاف يشوفني أكلم.. بعدين أحاكيك أوكي؟ باي حياتي !!
طــوط طــوط ..
يالربع هي قالت حياتي ولا ماقالت .. أخوكم في الله ( غاص ) في مرقده ..ثم قام..ثم انسدح..
خذت الجوال..دقيت على بوفهيد: سألته: الواحد لا كلم بنت..وحس برعشة ووده يحضن دولابه .. وش اسم هالحاله ؟
قال بخبث ومسوي فاهم: ههههههه.. ههههههه .. صرت زميل مهنة ياحياتي..والله وحبيت!!
قمت مبسوط وصاير مهلبية بالبشمل .. تركت بوفهيد على الخط ماقلت مع السلامه!!
رحت المراية.. (سرحت ) قذلتي اللي متطاق بسببها أنا وأبوي لي شهرين ..
قمت أبخبخ على روحي من كل عطر اشوفه قدامي..
حسيت نفسي انسان ثاني.. انسان غريب .. رومانسي .. صرت اسبح يومياً.. مو زي أول أسبح بس بالأعياد
المهم ..استمرت المكالمات بيني وبين نانسي.. تدق دقة وحده وتفصل ثم أرجع أكلمها ..
صح ان الفاتورة ( تمحطني ) بس كله لعيون الغلا يهون
صرت شخص ثاني..رومانسي عاطفي..صرت ما أتحمل اشوف الدجاجة تنذبح قدامي مع اني أول اذبح الخرفان بالعيد
اصحى من النوم أغني مع بشير : كتمت الحب وأثر الحب ماينفع له الكتمان
أمشي وأدندن مع وحيد الجزيره بن سعيد : ياناس حبيت واحد والمحبه صعيبه
في السيارة مع طلال دايركت : سيدي قوم ماخبرت اللي يحب يهتني بنووم سيدي قووم ..
ولا يهون سلامة وعيسى وعاصي الحلاني وباكيتا.. وش دخل الأخير ما أدري
صرت من الناس اللي يؤمنون بالحب من أول آلو ..
صار ابوفهيد يحسدني وانا اللي كنت أحسده .. مسج يروح مسج يجي واستمرينا مده على هالحال
قصتي مع نانسي (((((((الفصل الثاني))))))
العرض العادي
