هنتكلم النهارده عن الستائر بصفة عامة.. بس أول حاجة عايزة أتكلم عليها هي نبذة عن تاريخ الستائر علشان نعرف أصل موضوع الستائر ده كان إيه؟

الستائر لها تاريخ طويل

أول ناس بدأوا يصنعوا الستائر كانوا "أجدادنا الفراعنة" وكانت تصنع من قماش "الكتان" وكانت عبارة عن قطع قماش نازلة بشكل منسدل، وكانت في الغالب لونها "بيج" وده طبعاً هو لون الكتان الطبيعي وكانت قطع الستائر دي بتستخدم علشان تفصل بين حجرات المنزل...



بعد كده تطورت فكرة الستائر في "الحضارة الرومانية" وبدأوا يستخدموا القماش الحرير وبدأت الستائر تاخد أشكال مختلفة زي البرقع الدرابيه، وكانت الألوان المميزة في هذا الوقت هي "الأحمر"، "الأزرق"، و"الأبيض" وبدأوا أيام الرومان يحطوا الستائر فوق السرير زي الناموسية.



بعد كده تغير شكل الستائر وبالذات مع أيام الملكة "فيكتوريا" ملكة إنجلترا حيث بدأ اهتمام بالغ بالستائر، وبدأ يظهر القماش القطيفة المطرزة بخيوط الدهب وكانوا دايما بيحطوا على قماش الستارة علم المملكة وفي هذا العصر بدأوا يستخدموا قماش "التل" اللي عليه ورد بالقطيفة وقماش "الدانتيل" وأهم الألوان الموجودة في هذا العصر هي "النبيتي الغامق"، و"الموف" و"الدهبي".

أما الفرنساويين فهم أكتر ناس أبدعوا في أشكال الستائر، وكانوا دايما بيدّوا موديل الستارة شكل ملكي وبيستخدموا كمّ هائل من القماش وبيعملوا تداخل لمجموعة من الأقمشة مع بعض.

دي كانت نبذة عن تاريخ الستائر وتعالوا دلوقتي نعرف إزاي نختار الستائر المناسبة للبيت..

إزاي نشتري قماش؟
وازاي نعرف كمية القماش
اللي هتاخدها الستارة؟

أول حاجة قماش "الترجال" أو "الأورجانزا" ودي بتبقى أول طبقة في الستائر اللي هي الطبقة الشفافة عرض القماش بيكون 3 متر يعني لو القماشة سادة ممكن نقلب الطول عرض أو العرض طول ولازم يكون فيها كشكشة كتير وفيه حاجة اسمها "كشكشة دوبل" يعني بنكشكش القماش قد الشباك مرتين وفي حاجة تانية اسمها "كشكشة تربل" يعني بنكشكش القماش قد الشباك ثلاث مرات..

تاني حاجة هو القماش العادي اللي هو جوانب الستارة بيكون عرض القماش 140سم لو الشباك عرضه 2 متر يبقى هنحتاج نجيب له عرضين يعني 6 متر قماش أو 12 متر قماش لو إحنا عايزين الجناب تكون مكشكشة كتير..

ملحوظة هامة: لو الشباك في وسط الحيطة لما نيجي نعمل له ستارة بناخد 20 سم من بعد الشباك فقط يعني بلاش نعمل ستارة من الحيطة للحيطة، ولازم ناخد بالنا إن لو الشباك مافيهوش شيش يبقى لازم نحط قماش بلاك أوت علشان نحمي الستارة من الشمس والأتربة.


إزاي نختار موديل الستارة

وإحنا بنختار موديل الستارة لازم ناخد بالنا من شوية الحاجات دي..

ـ 1 ـ
شكل الشباك

لو الشباك بتاعنا عبارة عن شيش وزجاج هنلاقي إن من الصعب نعمل موديل فيه جناب عريضة أو برقع عريض؛ لأن ده هيمنع فتح الشباك ومش هيبين جمال الستارة..
ولو الشباك ألومنيوم منزلق يبقى ممكن نعمل أي موديل إحنا عايزينه.

ـ 2 ـ
فرش البيت والميزانية

لو البيت كلاسيك والميزانية كويسة
لو إحنا فارشين البيت كلاسيك يبقى لازم الستارة يكون فيها برقع درابيه ويكون قماش الستارة من الحرير، ويكون فيها عقادة كتير، وبمناسبة العقادة فهي الشراشيب اللي بتتحط في الستائر وتتركب في أطراف البرقع وأطراف الجوانب، وفيه منها أشكال كتير وعلى فكرة العقادة اللي فيها حبات كريستال هي الموضة اللي نازلة دلوقتي.

لو البيت كلاسيك والميزانية محدودة
يبقى ممكن نعمل برقع من العقادة وكل قماش الستارة يبقى من "الأورجانزا" أو "الترجال" وعلى فكرة قماش "الأورجانزا" سعره بيبدأ من 20 جنيه للمتر.

لو فرش البيت مودرن
يبقى الستارة بيكون شكلها أخف بكتير بتكون من القماش "الكتان" السادة أو "القطن" أو ممكن يكون قماش "كاروه" أو "مقلم"، ويكون الموديل بسيط جدًّا ويكون نازل منسدل.

بالنسبة لبيوت المصيف
ممكن تكون الستارة مصنوعة من البامبو أو قماش الخيش.


ـ 3 ـ
لون الحيطة

لازم ناخد بالنا كويس قوي من إن لون الستارة يكون مناسب للون الحطية، وبالنسبة لألوان الستائر بصفة عامة بنلاقي:
إن اللون "الدهبي" مع "النبيتي" بيليق علي حوائط "البيج".
واللون "الدهبي" مع "الأخضر" يليق مع الحوائط "الصفراء".
واللون "الأزرق" بيليق مع الحوائط "الرمادي".
ولون "البستاج" بيليق مع الحوائط "السيمون".


ودى شوية ستاير

شكرااااااااااااااااااااااااااااا